സോമാലിയയുടെ വടക്കുകിഴക്കൻ തീരത്തുനിന്നും കടൽകൊള്ളക്കാർ തട്ടിക്കൊണ്ടുപോയ ‘അസിനി’ (Azini) എന്ന മീൻപിടുത്ത കപ്പൽ സാഹസികമായി മോചിപ്പിച്ച് ഇന്ത്യൻ നേവി. 48 മണിക്കൂറിലധികം നീണ്ടുനിന്ന തന്ത്രപരമായ ഓപറേഷനൊടുവിലാണ് സായുധരായ കൊള്ളക്കാരിൽ നിന്നും കപ്പലും അതിലുണ്ടായിരുന്ന 20 ജീവനക്കാരെയും നേവി സുരക്ഷിതമായി വീണ്ടെടുത്തത്. കൊള്ളക്കാർ ഈ കപ്പൽ കേന്ദ്രീകരിച്ച് മറ്റ് ചരക്കുകപ്പലുകൾ ആക്രമിക്കാൻ (Mother Ship ആയി ഉപയോഗിക്കാൻ) പദ്ധതിയിടുന്നതിനിടെയാണ് ഇന്ത്യൻ നേവിയുടെ ഇടപെടൽ.
നാവികസേനയുടെ യുദ്ധക്കപ്പലും നിരീക്ഷണ വിമാനങ്ങളും സംയുക്തമായി നടത്തിയ തെരച്ചിലിലാണ് കപ്പലിന്റെ നീക്കങ്ങൾ കണ്ടെത്തിയത്. തുടർന്ന് വ്യോമസേനയുടെ സി-17 വിമാനം വഴി ഇന്ത്യൻ നാവികസേനയുടെ പ്രത്യേക കമാൻഡോ വിഭാഗമായ ‘മാർക്കോസിനെ’ (Marine Commandos) വിമാനമാർഗ്ഗം കടലിൽ പാരച്യൂട്ട് വഴി ഇറക്കി മിന്നൽ ഓപ്പറേഷൻ നടത്തുകയായിരുന്നു. കൊള്ളക്കാരുടെ ഭീഷണി പൂർണ്ണമായും നിർവീര്യമാക്കിയ കമാൻഡോകൾ ജീവനക്കാരെ പരിക്കേൽക്കാതെ രക്ഷപ്പെടുത്തി. ഇന്ത്യൻ മഹാസമുദ്ര മേഖലയിലെ സുരക്ഷാ പങ്കാളിയായും ആദ്യ പ്രതികരണ സേനയായും (First Responder) ഇന്ത്യയുടെ സന്നദ്ധത തെളിയിക്കുന്നതാണ് ഈ ഓപ്പറേഷൻ.
Indian Navy’s MARCOS commandos rescue hijacked fishing vessel ‘Azini’ and all 20 crew members off the Somalia coast in a daring 48-hour operation.
