അഹമ്മദാബാദ് വിമാന ദുരന്തം രാജ്യത്തെ ഞെട്ടിച്ചിരിക്കുകയാണ്. സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്നും ലണ്ടണിലേക്ക് പറന്നുയർന്ന എയർ ഇന്ത്യ ബോയിംഗ് 787-8 ഡ്രീംലൈനർ വിമാനം എയർപോർട്ടിനു സമീപം നിലംപതിക്കുകയായിരുന്നു. വിമാനത്തിൽ 230 യാത്രക്കാരും 12 ജീവനക്കാരും ഉൾപ്പെടെ 242 പേരുണ്ടായിരുന്നു. വിശ്വാസ്യതയ്ക്കും നൂതന സുരക്ഷാ സവിശേഷതകൾക്കും പേരുകേട്ട ബോയിംഗ് 787-8 ഡ്രീംലൈനറിന് ശക്തമായ പ്രവർത്തന റെക്കോർഡാണുള്ളത്. അതുകൊണ്ടുതന്നെ ഈ അപകടം ഇന്ത്യയുടെ വ്യോമയാന മേഖലയെ സംബന്ധിച്ച് അപൂർവവും അതോടൊപ്പം ആശങ്കാജനകവുമാണ്.
കാര്യക്ഷമത, സുഖസൗകര്യങ്ങൾ, പാരിസ്ഥിതിക പ്രകടനം എന്നിവയ്ക്കായി രൂപകൽപ്പന ചെയ്ത അത്യാധുനിക, ദീർഘദൂര, വൈഡ്-ബോഡി വിമാനമാണ് ബോയിംഗ് 787-8 ഡ്രീംലൈനർ. 2011ൽ അവതരിപ്പിച്ച 787-8 ബോയിംഗിന്റെ ഡ്രീംലൈനർ പരമ്പരയിലെ ആദ്യ മോഡലാണ്. സാധാരണയായി 242നും 290 നും ഇടയിൽ യാത്രക്കാർക്ക് ഇരിക്കാവുന്ന സൗകര്യമാണ് വിമാനത്തിലുള്ളത്. അതുകൊണ്ടുതന്നെ ഉയർന്ന ട്രാഫിക്കുള്ള ദീർഘദൂര റൂട്ടുകൾക്ക് ഇവ അനുയോജ്യമാണ്. ഭാരം കുറഞ്ഞതും കൂടുതൽ ഇന്ധനക്ഷമതയുള്ളതുമായ വിമാനമായ ഡ്രീംലൈനറിന് 13530 കിലോമീറ്റർ വരെ നിർത്താതെ പറക്കാനാകും.
ഏറ്റവും പുതിയ ഏവിയോണിക്സ്, ഫ്ലൈ-ബൈ-വയർ നിയന്ത്രണങ്ങൾ, നൂതന സുരക്ഷാ സംവിധാനങ്ങൾ എന്നിവയാണ് ഡ്രീംലൈനറിന് ഉള്ളത്. സിന്തറ്റിക് വിഷൻ സിസ്റ്റം (SVS), ഇന്റഗ്രേറ്റഡ് മോഡുലാർ ഏവിയോണിക്സ് (IMA) തുടങ്ങിയ സവിശേഷതകളും വിമാനത്തിനുണ്ട്. പറന്നുയർന്നതിന് തൊട്ടുപിന്നാലെയുണ്ടായ അപകടത്തിന്റെ കാരണം എയർ ഇന്ത്യയും ഡയറക്ടറേറ്റ് ജനറൽ ഓഫ് സിവിൽ ഏവിയേഷനും അന്വേഷിച്ചുകൊണ്ടിരിക്കുകയാണ്.
An Air India Boeing 787-8 Dreamliner, flight AI171 to London, crashed near Ahmedabad airport shortly after takeoff with 242 onboard. Investigations are underway for the advanced aircraft known for its strong safety record.
