റഷ്യൻ പ്രസിഡന്റ് വ്ലാഡിമിർ പുടിന്റെ ഇന്ത്യാ സന്ദർശന വേളയിൽ ഇന്ത്യയുടേയും റഷ്യയുടേയും പ്രതിരോധ മന്ത്രിമാർ കൂടിക്കാഴ്ച നടത്തും. ഡിസംബർ 4ന് ന്യൂഡൽഹിയിലാണ് കൂടിക്കാഴ്ച നടക്കുക. പ്രതിരോധ സഹകരണം അവലോകനം ചെയ്യുന്നതിനും പങ്കാളിത്തത്തിന്റെ പുതിയ വഴികൾ തേടുന്നതിനുമായി പ്രതിരോധ മന്ത്രി രാജ്‌നാഥ് സിംഗ് റഷ്യൻ പ്രതിരോധ മന്ത്രി ആൻഡ്രി ബെലോസോവുമായി ചർച്ച നടത്തുമെന്ന് പ്രതിരോധ വൃത്തങ്ങൾ സ്ഥിരീകരിച്ചു. റഷ്യയുടെ എസ്-400 മിസൈൽ പ്രതിരോധ സംവിധാനത്തിന്റെ ആധുനികവും ശക്തവുമായ എസ്-500 സംവിധാനം വാങ്ങാനുള്ള ഇന്ത്യയുടെ നീക്കം കൂടിക്കാഴ്ചയിൽ പ്രധാന ചർച്ചയാകും.
റഷ്യയിൽ നിന്ന് വാങ്ങിയ എസ്-400 മിസൈൽ പ്രതിരോധ സംവിധാനത്തിന്റെ മികവ് ഓപ്പറേഷൻ സിന്ദൂറിൽ ഇന്ത്യയ്ക്ക് ബോധ്യമായിരുന്നു. പാകിസ്താൻ നടത്തിയ ആക്രമണങ്ങളെ പ്രതിരോധിക്കുന്നതിൽ നട്ടെല്ലായി പ്രവർത്തിച്ച വ്യോമ പ്രതിരോധ സംവിധാനമാണ് ഇന്ത്യ സുദർശൻ ചക്ര എന്ന് പേരിട്ടിരിക്കുന്ന എസ്-400. ഈ സാഹചര്യത്തിലാണ് എസ്-400 ന് പുറമെ റഷ്യയിൽ നിന്ന് ഇതിന്റെ ആധുനികവും ശക്തവുമായ എസ്-500 സംവിധാനം വാങ്ങാനുള്ള പദ്ധതിയുമായി മുന്നോട്ടുരോകാൻ ഇന്ത്യ തീരുമാനിച്ചത്. റഷ്യയുടെ നെക്സ്റ്റ് ജെൻ എസ് -500 സംവിധാനത്തിന് 600 കിലോമീറ്റർ വരെയുള്ള ബാലിസ്റ്റിക് മിസൈലുകളും 400 കിലോമീറ്റർ വരെയുള്ള വ്യോമ ലക്ഷ്യങ്ങളും തടയാൻ കഴിയും. കപ്പൽ നിർമാണം, സംയുക്തമായി വികസിപ്പിച്ച ആയുധ സംവിധാനങ്ങൾ എന്നിവയെക്കുറിച്ചും മന്ത്രിമാർ ചർച്ച നടത്തും.
India and Russia’s Defence Ministers will meet on Dec 4 in New Delhi to discuss defence cooperation, including India’s potential acquisition of the advanced S-500 missile system.
