പ്രധാനമന്ത്രി നരേന്ദ്ര മോദിയും ഫ്രാൻസ് പ്രസിഡന്റ് ഇമ്മാനുവൽ മാക്രോണും തമ്മിൽ ഫ്രഞ്ച് നഗരമായ നീസിൽ വെച്ച് നടത്തിയ ഉഭയകക്ഷി ചർച്ചയിൽ ഇരുരാജ്യങ്ങളും തമ്മിലുള്ള തന്ത്രപ്രധാന പങ്കാളിത്തം കൂടുതൽ ശക്തമാക്കാൻ ധാരണയായി. ‘ഭാരത് ഇന്നൊവേഷൻ’ സാങ്കേതിക കോൺഫറൻസിൽ പങ്കെടുക്കാനെത്തിയ പ്രധാനമന്ത്രി മോദിയും മാക്രോണും തമ്മിലുള്ള കൂടിക്കാഴ്ചയിൽ, ഇരുരാജ്യങ്ങളും തമ്മിൽ ‘ഇന്നൊവേഷൻ റോഡ്മാപ്പ് 2030’ അംഗീകരിക്കുകയും സാമ്പത്തിക സുരക്ഷാ ഡയലോഗിന് തുടക്കമിടുകയും ചെയ്തു. നിലവിലുള്ള 16 ബില്യൺ ഡോളറിന്റെ ഉഭയകക്ഷി വ്യാപാരം അടുത്ത അഞ്ച് വർഷത്തിനുള്ളിൽ ഇരട്ടിയാക്കാനുള്ള ഉന്നതതല സംവിധാനം രൂപീകരിക്കാനും ഇരുനേതാക്കളും സമ്മതിച്ചു.
എഐ മേഖലയിലെ സഹകരണം വ്യാപിപ്പിക്കുന്നതിനായി ഇരുരാജ്യങ്ങളും ചേർന്ന് ജോയിന്റ് ഇന്ത്യ-ഫ്രാൻസ് എഐ വർക്കിംഗ് ഗ്രൂപ്പ് രൂപീകരിക്കാൻ ധാരണയായി. ഈ വർഷം ഫെബ്രുവരിയിൽ ഒപ്പുവെച്ച ഇന്ത്യ-ഇയു സ്വതന്ത്ര വ്യാപാര കരാർ (India-EU FTA) എത്രയും വേഗം നടപ്പിലാക്കാൻ ഇരുപക്ഷവും ആഹ്വാനം ചെയ്തു. റഫാൽ യുദ്ധവിമാനങ്ങൾ, സ്കോർപീൻ അന്തർവാഹിനികൾ എന്നിവയുടെ വിജയകരമായ സഹകരണത്തിന് പിന്നാലെ, പ്രതിരോധ പ്ലാറ്റ്ഫോമുകളുടെയും നൂതന സാങ്കേതികവിദ്യകളുടെയും സംയുക്ത രൂപകൽപ്പനയ്ക്കും ഉത്പാദനത്തിനും കൂടുതൽ പ്രാധാന്യം നൽകാനും ചർച്ചയിൽ തീരുമാനമായി.
കൂടാതെ, ഇന്ത്യയിലെ പുതിയ നിയമനിർമ്മാണങ്ങൾ വഴി ചെറുകിട മോഡുലാർ റിയാക്ടറുകൾ ഉൾപ്പെടെയുള്ള സിവിൽ ആണവോർജ്ജ മേഖലയിൽ ഫ്രഞ്ച് കമ്പനികൾക്ക് നേരിട്ടോ ഇന്ത്യൻ സ്വകാര്യ കമ്പനികളുമായി ചേർന്നോ നിക്ഷേപം നടത്താൻ വഴിതുറക്കും. ഇന്ത്യൻ പൗരന്മാർക്ക് ഫ്രഞ്ച് വിമാനത്താവളങ്ങളിൽ അതിവേഗ വിസ രഹിത ട്രാൻസിറ്റ് സൗകര്യം ഏർപ്പെടുത്തിയതിന് പ്രധാനമന്ത്രി മോദി നന്ദി അറിയിച്ചതിനൊപ്പം, ഇന്ത്യയുടെ പുതിയ വിദ്യാഭ്യാസ നയത്തിന് കീഴിൽ ക്യാമ്പസുകൾ ആരംഭിക്കാൻ ഫ്രഞ്ച് സർവകലാശാലകളെ അദ്ദേഹം ക്ഷണിക്കുകയും ചെയ്തു. പശ്ചിമേഷ്യൻ പ്രതിസന്ധി (ഇറാൻ, ഗാസ വിഷയങ്ങൾ), യുക്രെയ്ൻ യുദ്ധം തുടങ്ങിയ ആഗോള വിഷയങ്ങളും ഇരുനേതാക്കളും ചർച്ച ചെയ്തു. നീസിലെ കൂടിക്കാഴ്ചയ്ക്ക് ശേഷം പ്രധാനമന്ത്രി മോദി ഓസ്ട്രിയയിലെ വിയന്ന വഴി സ്ലൊവാക്യയിലേക്ക് തിരിച്ചു. എവിയൻ-ലെ-ബെയ്ൻസിൽ നടക്കുന്ന ജി7 ഉച്ചകോടിയിൽ പങ്കെടുക്കാൻ അദ്ദേഹം വീണ്ടും ഫ്രാൻസിലെത്തും.
PM Narendra Modi and French President Emmanuel Macron met in Nice, adopting the ‘Innovation Roadmap 2030’ and agreeing to double bilateral trade in 5 years.
