ആറാം തലമുറ മൊബൈൽ കണക്റ്റിവിറ്റിയായ 6ജിയുടെ വരവിനുള്ള തയ്യാറെടുപ്പുകളുമായി ജിയോ. ആഗോള 6ജി സാങ്കേതിക മാനദണ്ഡങ്ങൾ 2030-ൽ അന്തിമമാകുമ്പോൾ, 6ജി സേവനങ്ങൾ അവതരിപ്പിക്കുന്ന ആദ്യ രാജ്യങ്ങളിൽ ഒന്നായി ഇന്ത്യ മാറാൻ സാധ്യതയുണ്ടെന്ന് ജിയോ വ്യക്തമാക്കി. ജിയോ വികസിപ്പിച്ച പ്രീ-6ജി സാങ്കേതിക സംവിധാനവും (Pre-6G Stack) ഗിഗാ മിമോ റേഡിയോയും ന്യൂഡൽഹിയിൽ നടക്കുന്ന ഇന്ത്യ മൊബൈൽ കോൺഗ്രസ് (ഐഎംസി) 2026-ൽ പ്രദർശിപ്പിക്കുന്നുണ്ട്.
നിലവിലെ 5ജി നെറ്റ്‌വർക്കുകളെ അപേക്ഷിച്ച് അഞ്ചുമടങ്ങ് വരെ ശേഷി കൈവരിക്കാനും ഡാറ്റ കൈമാറ്റത്തിലെ കാലതാമസം (ലേറ്റൻസി) പത്തിലൊന്നായി കുറയ്ക്കാനുമാണ് 6ജിയിലൂടെ ലക്ഷ്യമിടുന്നതെന്ന് ജിയോ അറിയിച്ചു. ഇതിലൂടെ ഒരേസമയം കൂടുതൽ ഡാറ്റ കൈകാര്യം ചെയ്യാനും കൂടുതൽ ഉപയോക്താക്കൾക്ക് സേവനം നൽകാനും സാധിക്കും. നിർദേശങ്ങളോടും കമാൻഡുകളോടും നെറ്റ്‌വർക്കുകൾ പ്രതികരിക്കുന്ന വേഗവും ഗണ്യമായി വർധിക്കും. ഡാറ്റ വേഗതയിലും പുരോഗതി പ്രതീക്ഷിക്കുന്നു.
തത്സമയ നിർമിതബുദ്ധി (എഐ) സേവനങ്ങൾ, ഹോളോഗ്രാഫിക് വീഡിയോ, ആരോഗ്യപരിചരണം, വിദ്യാഭ്യാസം തുടങ്ങിയ മേഖലകളിൽ പുതിയ സാധ്യതകൾ തുറക്കാൻ ഈ സാങ്കേതിക മുന്നേറ്റങ്ങൾക്ക് കഴിയുമെന്നാണ് വിലയിരുത്തൽ.
Reliance Jio showcased its indigenous Pre-6G stack and Giga MIMO radio at IMC 2026, aiming to make India one of the first countries to roll out 6G technology by 2030.
