ഐ.ടി നഗരമായ ബെംഗളൂരുവിനെയും ഇന്ത്യയുടെ സാമ്പത്തിക തലസ്ഥാനമായ മുംബൈയെയും ബന്ധിപ്പിക്കുന്ന വന്ദേ ഭാരത് സ്ലീപ്പർ എക്സ്പ്രസ് സർവീസ് ആരംഭിച്ചു. കേന്ദ്ര റെയിൽവേ മന്ത്രി അശ്വിനി വൈഷ്ണവ് നവംബർ 1-ന് ബെംഗളൂരു സർ എം. വിശ്വേശ്വരയ്യ ടെർമിനലിൽ (SMVT) വച്ചാണ് ദക്ഷിണേന്ത്യയിലെ ആദ്യ വന്ദേ ഭാരത് സ്ലീപ്പർ ട്രെയിൻ ഫ്ലാഗ് ഓഫ് ചെയ്തത്. സർവീസ് ആരംഭിക്കുന്നതിന് മുൻപ് തന്നെ അഡ്വാൻസ് ബുക്കിംഗിൽ വലിയ തിരക്കാണ് അനുഭവപ്പെട്ടത്. ബുക്കിംഗ് ആരംഭിച്ച മണിക്കൂറുകൾക്കകം തന്നെ പ്രധാന തീയതികളിലെ ടിക്കറ്റുകൾ വിറ്റുതീർന്ന് യാത്രക്കാർ വെയ്റ്റിംഗ് ലിസ്റ്റിലായി.
16 കോച്ചുകളുള്ള അത്യാധുനിക സ്ലീപ്പർ ട്രെയിനിൽ തേർഡ് എ.സി, സെക്കൻഡ് എ.സി, ഫസ്റ്റ് എ.സി എന്നിങ്ങനെ മൂന്ന് ക്ലാസുകളാണുള്ളത്. ബെംഗളൂരുവിൽ നിന്ന് മുംബൈയിലേക്ക് തേർഡ് എ.സിക്ക് 2,810 രൂപയും സെക്കൻഡ് എ.സിക്ക് 3,630 രൂപയും ഫസ്റ്റ് എ.സിക്ക് 4,450 രൂപയുമാണ് ടിക്കറ്റ് നിരക്ക്. നിലവിൽ ഇരു നഗരങ്ങൾക്കുമിടയിൽ സർവീസ് നടത്തുന്ന ഉദ്യാൻ എക്സ്പ്രസിനേക്കാൾ ആറ് മണിക്കൂറോളം സമയലാഭം ഈ ട്രെയിൻ വഴി യാത്രക്കാർക്ക് ലഭിക്കും. ആകെ 16 മണിക്കൂർ 10 മിനിറ്റുകൊണ്ടാണ് വന്ദേ ഭാരത് സ്ലീപ്പർ ഈ ദൂരം സഞ്ചരിച്ചെത്തുന്നത്.
ബെംഗളൂരുവിൽ നിന്ന് രാത്രി 7:45-ന് പുറപ്പെടുന്ന ട്രെയിൻ തൊട്ടടുത്ത ദിവസം രാവിലെ 11:55-ന് മുംബൈ ഛത്രപതി ശിവാജി മഹാരാജ് ടെർമിനസിൽ (CSMT) എത്തും. തിങ്കളാഴ്ച ഒഴികെ ആഴ്ചയിൽ ആറ് ദിവസമായിരിക്കും ഈ റൂട്ടിൽ സർവീസ് ഉണ്ടാവുക. മടക്ക സർവീസ് ചൊവ്വാഴ്ച ഒഴികെയുള്ള ദിവസങ്ങളിൽ രാത്രി 8:10-ന് മുംബൈയിൽ നിന്ന് പുറപ്പെട്ട് അടുത്ത ദിവസം ഉച്ചയ്ക്ക് 12 മണിക്ക് ബെംഗളൂരുവിൽ എത്തും. അനന്തപൂർ, ഗുണ്ടക്കൽ, റായ്ച്ചൂർ, യാദ്ഗിർ, കൽബുറഗി, സോലാപൂർ, പൂനെ, കല്യാൺ എന്നീ 8 പ്രധാന സ്റ്റേഷനുകളിലാണ് ട്രെയിനിന് സ്റ്റോപ്പുകൾ അനുവദിച്ചിട്ടുള്ളത്.
South India’s first Vande Bharat Sleeper train connecting Bengaluru and Mumbai has been flagged off. Advance bookings witnessed a record rush with tickets selling out within minutes.
