ആന്ധ്രാപ്രദേശിലെ ഗൂഗിളിന്റെ ആർട്ടിഫിഷ്യൽ ഇന്റലിജൻസ് (AI) ഹബ്ബിൽ 5 ബില്യൺ ഡോളർ നിക്ഷേപിക്കാൻ അദാനി ഗ്രൂപ്പ്. ചീഫ് ഫിനാൻഷ്യൽ ഓഫീസർ ജുഗീഷന്ദർ സിംഗാണ് ഇക്കാര്യം അറിയിച്ചത്. നിക്ഷേപം വികസിക്കുമെന്നും ഗൂഗിളിനു പുറമേ മറ്റ് പല കമ്പനികളും അദാനി ഗ്രൂപ്പുമായി സഹകരിക്കാൻ താൽപര്യം അറിയിച്ചതായും അദ്ദേഹം പറഞ്ഞു.
പദ്ധതിക്കായി 15 ബില്യൺ ഡോളർ നിക്ഷേപം നടത്തുമെന്ന് ഗൂഗിൾ കഴിഞ്ഞ മാസം വ്യക്തമാക്കിയിരുന്നു. എഐ ഭാവി രൂപപ്പെടുത്താൻ ആന്ധ്രാപ്രദേശിൽ വരുന്ന അദാനി-ഗൂഗിൾ പങ്കാളിത്തം സഹായിക്കും. ഇന്ത്യയെ ലോകത്തിലെ ഏറ്റവും സുസ്ഥിര ഇന്റലിജൻസ് കേന്ദ്രമാക്കി മാറ്റുക എന്നതാണ് ലക്ഷ്യം. ഇത് വെറുമൊരു നിക്ഷേപമല്ലെന്നും ആഗോള എഐ സമ്പദ്വ്യവസ്ഥയുടെ കേന്ദ്രത്തിൽ ഇന്ത്യയെ സ്ഥാപിക്കാനുള്ള തന്ത്രപരമായ നീക്കമാണെന്നും അദാനി ഗ്രൂപ്പ് പ്രതിനിധി പറഞ്ഞു.
ആന്ധ്രാപ്രദേശിലെ വിശാഖപട്ടണത്ത് ഇന്ത്യയിലെ ഏറ്റവും വലിയ ആർട്ടിഫിഷ്യൽ ഇന്റലിജൻസ് ഡാറ്റാ സെന്റർ കാമ്പസ് നിർമിക്കുന്നതിനായാണ് അദാനി എന്റർപ്രൈസസ്, അവരുടെ സംയുക്ത സംരംഭമായ അദാനി കോൺനെക്സിലൂടെ ഗൂഗിളുമായി കൈകോർക്കുന്നത്. കഴിഞ്ഞ മാസം പുറത്തിറക്കിയ പത്രക്കുറിപ്പ് പ്രകാരം, വിശാഖപട്ടണത്തുള്ള ഗൂഗിളിന്റെ എഐ ഹബ്ബിൽ 2026 മുതൽ 2030 വരെയുള്ള അഞ്ച് വർഷത്തിനുള്ളിൽ ഏകദേശം 15 ബില്യൺ ഡോളറിന്റെ നിക്ഷേപമാണ് വരിക.
ഹരിത ഊർജം ഉപയോഗിച്ച് പ്രവർത്തിക്കുന്നതും ശക്തമായ സബ് സീ കേബിൾ ശൃംഖലയിലൂടെ ബന്ധിപ്പിക്കുന്നതുമായ ഗിഗാവാട്ട് സ്കെയിൽ ഡാറ്റാ സെന്റർ പ്രവർത്തനങ്ങൾ ഹബ്ബിൽ ഉൾപ്പെടും. ഇന്ത്യയിലുടനീളമുള്ള വിപുലമായ എഐ വർക്ക്ലോഡുകൾക്കും നവീകരണത്തിനും ഈ കാമ്പസ് നട്ടെല്ലായി പ്രവർത്തിക്കും. അദാനികോൺഎക്സിനൊപ്പം എയർടെലും പദ്ധതിയിൽ സഹകരിക്കും. ഇന്ത്യയുടെ കമ്പ്യൂട്ടിംഗ് ശക്തി വർധിപ്പിക്കുന്നതിനും സാങ്കേതിക പരിവർത്തനത്തിന്റെ പുതിയ യുഗത്തെ പിന്തുണയ്ക്കുന്നതിനുമായി രൂപകൽപന ചെയ്തിരിക്കുന്ന എഐ ഡാറ്റാ സെന്ററായിരിക്കും ഇതിന്റെ കാതൽ. ആന്ധ്രാപ്രദേശിൽ ഉടനീളമുള്ള പുതിയ ട്രാൻസ്മിഷൻ ലൈനുകൾ, പുനരുപയോഗിക്കാവുന്ന വൈദ്യുതി ഉത്പാദനം, ഊർജ സംഭരണ സംവിധാനങ്ങൾ എന്നിവയിലെ നിക്ഷേപവും പദ്ധതിയിൽ ഉൾപ്പെടുന്നു.
Adani Group commits $5 Billion to develop India’s largest AI Data Center Campus and Green Energy infrastructure with Google in Visakhapatnam.
