സംസ്ഥാനത്തെ റോഡ് അടിസ്ഥാന സൗകര്യങ്ങൾ രാജ്യാന്തര നിലവാരത്തിലേക്ക് ഉയർത്തുന്നതിനായി 2026-27 സാമ്പത്തിക വർഷത്തെ പരിഷ്കരിച്ച ബജറ്റിൽ 5,952.29 കോടി രൂപയുടെ റെക്കോർഡ് തുക വകയിരുത്തി ധനവകുപ്പ്. കേരളത്തിലെ റോഡുകളും ബൈപ്പാസുകളും ജംഗ്ഷനുകളും ആധുനികവത്കരിക്കുന്നതിനായി പൊതുമരാമത്ത് വകുപ്പിന് (PWD) കീഴിൽ പ്രത്യേക ‘റോഡ് ആർക്കിടെക്ചർ വിംഗ്’ രൂപീകരിക്കുമെന്ന് ബജറ്റ് പ്രഖ്യാപനത്തിൽ വ്യക്തമാക്കുന്നു. ഇതിന്റെ ഭാഗമായി നിലവിലുള്ള പിഡബ്ല്യുഡി മാനുവൽ പരിഷ്കരിക്കുകയും ചെയ്യും. അടുത്ത അഞ്ച് വർഷത്തിനുള്ളിൽ സംസ്ഥാനത്തെ എല്ലാ പൊതുമരാമത്ത് റോഡുകളും ബിഎം ആൻഡ് ബിസി (BM & BC) നിലവാരത്തിലേക്ക് ഉയർത്തുമെന്നും വിദേശരാജ്യങ്ങളിലേതിന് സമാനമായി റോഡ് പരിശോധനകൾക്കായി എഐ (AI) സാങ്കേതികവിദ്യ നടപ്പിലാക്കുമെന്നും ബജറ്റിൽ പറയുന്നു.
വിഴിഞ്ഞം അന്താരാഷ്ട്ര തുറമുഖത്തെ രാജ്യത്തിന്റെ വിവിധ ഭാഗങ്ങളുമായി ബന്ധിപ്പിക്കുന്ന വിഴിഞ്ഞം-നവായുകുളം ഔട്ടർ റിംഗ് റോഡ് പദ്ധതിക്ക് ആദ്യഘട്ടമായി 100 കോടി രൂപ ബജറ്റിൽ അനുവദിച്ചിട്ടുണ്ട്. ഇതോടൊപ്പം ദേശീയപാത 66-ലെ കോഹിനൂരിൽ നിന്ന് കോഴിക്കോട് വിമാനത്താവളത്തിലേക്ക് എലിവേറ്റഡ് ഹൈവേ, കോട്ടയം സ്കൈവാക്ക് നിർമ്മാണത്തിന്റെ പുനരാരംഭം, പത്തനാപുരം ടൗൺ റിംഗ് റോഡ്, ഗോശ്രീ-ബോൾഗാട്ടി സമാന്തര പാലം എന്നിവയും ബജറ്റിലെ പ്രധാന പ്രഖ്യാപനങ്ങളാണ്. കൂടാതെ മലപ്പുറം വണ്ടൂർ, വാണിയമ്പലം എന്നിവിടങ്ങളിൽ റെയിൽവേ ഓവർബ്രിഡ്ജുകൾ (ROB) നിർമ്മിക്കുന്നതിനായി 5 കോടി രൂപയും പെരിന്തൽമണ്ണ ഒരാടംപാലം-മാനത്തുമംഗലം ബൈപ്പാസ് ഭൂമി ഏറ്റെടുക്കലിനായി 10 കോടി രൂപയും വകയിരുത്തിയിട്ടുണ്ട്.
Kerala Budget earmarks a record ₹5,952.29 crore for road infrastructure, setting up a new PWD Road Architecture Wing and funding major bypasses and highways
