റഷ്യ-ഉക്രെയ്ൻ യുദ്ധം അവസാനിപ്പിക്കുന്നതിനായി അന്താരാഷ്ട്ര തലത്തിൽ മുന്നോട്ടുവെച്ച വിവിധ സമാധാന പദ്ധതികളിൽ വെച്ച് ഇന്ത്യയുടേതാണ് ഏറ്റവും സമഗ്രമെന്ന് ഉക്രെയ്ൻ വ്യക്തമാക്കി. തുർക്കി, ഈജിപ്ത്, അമേരിക്ക തുടങ്ങിയ രാജ്യങ്ങളുടെ നിർദ്ദേശങ്ങളെക്കാൾ വിപുലമാണ് ഇന്ത്യയുടെ പദ്ധതിയെന്നും, കരിങ്കടലിലെ കപ്പൽ ഗതാഗത സുരക്ഷ, ധാന്യ കയറ്റുമതി, ഊർജ്ജ അടിസ്ഥാന സൗകര്യങ്ങൾക്ക് നേരെയുള്ള ആക്രമണങ്ങൾ പൂർണ്ണമായി നിർത്തൽ തുടങ്ങിയ സുപ്രധാന കാര്യങ്ങൾ ഇതിൽ ഉൾപ്പെടുന്നുണ്ടെന്നും ഉക്രേനിയൻ വിദേശകാര്യ മന്ത്രി ആൻഡ്രി സിബിഹ പറഞ്ഞു. പ്രധാനമന്ത്രി നരേന്ദ്ര മോദിയുടെ സമാധാന ആശയങ്ങളെ റഷ്യൻ പ്രസിഡന്റ് വ്ലാഡിമിർ പുടിനും നേരത്തെ പ്രശംസിച്ചിരുന്നു.
അതേസമയം, ഉക്രെയ്ൻ സംഘർഷത്തിൽ ഇന്ത്യ വെറും നയതന്ത്ര പ്രസ്താവനകൾക്കപ്പുറം ഇരുരാജ്യങ്ങളുമായി സജീവ ചർച്ചകൾ നടത്തിവരികയാണെന്ന് വിദേശകാര്യ മന്ത്രി എസ്. ജയശങ്കർ വ്യക്തമാക്കി. ഡൽഹിയിൽ നടന്ന മ്യൂണിക്ക് ലീഡേഴ്സ് മീറ്റിംഗിൽ സംസാരിക്കവെയാണ് അദ്ദേഹം ഇക്കാര്യം അറിയിച്ചത്. കരിങ്കടലിലെ കപ്പൽ സുരക്ഷ, ധാന്യ-ഊർജ്ജ കയറ്റുമതി എന്നിവയുമായി ബന്ധപ്പെട്ട് റഷ്യയുമായും ഉക്രെയ്നുമായും ഇന്ത്യ നിരന്തരം ചർച്ചകൾ നടത്തിവരികയാണെന്നും, ഇരു രാജ്യങ്ങളും തമ്മിലുള്ള പ്രശ്നങ്ങൾ നയതന്ത്ര മാർഗ്ഗങ്ങളിലൂടെയും സംഭാഷണങ്ങളിലൂടെയും പരിഹരിക്കപ്പെടണമെന്നാണ് ഇന്ത്യയുടെ ആഗ്രഹമെന്നും ജയശങ്കർ കൂട്ടിച്ചേർത്തു.
Ukraine calls India’s peace proposal for ending the Russia-Ukraine war the most comprehensive, covering Black Sea security, grain exports and energy infrastructure.
